Requisits prèvis:

• Auer un sistèma d’identificacion digitau entà entrar en La Meva Salut: era persona sollicitanta a de poder entrar en sòn espaci de salut damb un sistèma d’identificacion pròpi, com idCAT Mòbil, contrasenha o certificat digitau (CD).
• Poder acreditar era relacion: cau presentar era documentacion qu’acredite era relacion damb era persona de qui se demane er accès en perfil (libre de família o document legau qu’acredite era tutela).

Passi a seguir:

• Adreçar-se ath CAP damb era documentacion següenta:
  • Era targeta sanitària individuau (TSI) e eth DNI o document identificatiu dera persona que presente era sollicitud.
  • Era TSI dera persona de qui se demane er accès.
  • Eth libre de família o certificat literau de neishement, se se tracte d’un menor, o era documentacion legau qu’acredite qu’era persona sollicitanta ei era responsabla legau, en casa de persones tutelades.
• Demanar en taulèu que se vò obtier accès a La Meva Salut de un aute perfil e acreditar era relacion. Eth personau deth CAP comprovarà es dades e era relacion damb era persona de qui se demane er accès.
• Signar era sollicitud d'accès. Un còp signada era sollicitud, se recep un corrèu electronic que confirme que s’abilitat er accès en perfil deth menor o dera persona tutelada. A partir d’aqueth moment, quan s’entre en La Meva Salut, se pòt trigar se se vò continuar en perfil pròpi o accedir ath perfil deth menor o dera persona tutelada.

Es pairs, mairs o responsables legaus pòden accedir a La Meva Salut des sòns hilhs, hilhes o menors tutelats enquia qu’aguesti complisquen es 18 ans. Ara ben, a partir des 16 ans, coma que s’artenhe era majoria d’edat sanitària, cau tanben eth sòn consentiment explicit entà perméter er accès ath sòn perfil.

Era sollicitud d’accès s’a de hèr presenciaument en centre d’atencion primària (CAP), seguint eth madeish procediment establit entàs menors de 16 ans e es persones tutelades. En aguest cas, totun, ei imprescindible qu’era persona de 16 o 17 ans dongue eth sòn consentiment.

Se ja se disposaue d’accés a La Meva Salut deth menor, er accès demore inabilitat eth dia que hè 16 ans, enquia qu’aguest dongue eth sòn consentiment. Pòt dar-lo presenciaument en CAP o dirèctament des de La Meva Salut, se ja i a  accès personau.

Es persones de 16 e 17 ans pòden accedir ath sòn pròpi espaci de La Meva Salut utilizant quinsevolh des sistèmes d’identificacion següenti:

• Contrasenha e document d’identificacion personau (DNI, NIE o passapòrt) o contrasenha e còdi d’identificacion personau (CIP), qu’apareish ena targeta sanitària individuau (TSI). Era contrasenha s’a de sollicitar presenciaument en centre d’atencion primària (CAP).
• idCAT Mòbil, que se pòt obtier:
  • de manèra presenciau enes oficines d’atencion ciutadana dera Generalitat (OAC), o ben
  • per internet, a travès d’un formulari digitau, qu’incorpòre eraajuda d’un assistent entà facilitar eth procès.

Es persones de 16 e 17 ans pòden autorizar qu’es pairs, mairs o responsables legaus accedissen ath sòn perfil personau en La Meva Salut. Aguest consentiment se pòt gestionar des dera seccion “Dades personaus”, en blòc “Accèssi ath mèn perfil”, o presenciaument en CAP.

Ei imprescindible compdar damb eth consentiment explicit dera persona menor d’edat quan a 16 o 17 ans tà perméter aguest accès e se pòt revocar en quinsevolh moment, autant des de La Meva Salut coma adreçant-se ath CAP.

Er accès ath perfil de La Meva Salut de hilhs, hilhes e menors tutelats ei possible enquiath dia en qué complisquen 18 ans. A compdar d’aguest moment, er accès ath sòn perfil se desactive automaticament.

Quan ua persona adulta ei representanta legau de ua auta persona, pòt accedir ath sòn perfil en La Meva Salut a compdar dera data en qué ac autorize era senténcia judiciau, e enquiara data que s’indique o enquia qu’ua naua resolucion judiciau ne modifique es condicions. En aguest cas, era persona representada poderà entrar en sòn pròpi perfil igualment.

Cau hèr era sollicitud d’accès presenciaument en centre d’atencion primària (CAP), seguint eth madeish procediment qu’entàs menors de 16 ans.